السلام عليكم ورحمة الله وبركاته
يا هلا ومرحبه بكل من يزور المدونة والمدونه مدونتكم والحلال حلالكم ويا حياكم الله...
نورتوا المكان
عقب ما رحبنا فيكم ألحين نقدم لكم حلو الضيافة مع القهوة العربية التي تفوح بريحة الزعفران والهيل ولكن لسوء خدمة التوصيل وعدم قدرتي على تذويقها لكم الكترونياُ
أعوضها لكم بكلمات جميلة ..فقولوا
"سبحان الله وبحمده سبحان العظيم" نخلة بالجنة شتبون بعد
يالله عاد الحين أقول لكم السالفه راح أعرفكم على بنيتي "مدونتي" وبعدين على نفسي
شارع الجهرا غني عن التعريف عندنا طبعا هو شارع الزقرتية و الكشخة والدلع في الماضي والحاضر و مثل ما هو معروف هذه الصفات موجودة دائما عند فئة الشاب وخاصة البنات , وبما اني شابه جذي سميتها بهذا الأسم
..."الله يخليها لكم ويخليكم لها"...
فمن خلال مدونتي راح أنقل لكم أفكاري وما يدور في بالي كفتاة كويتية شابه حابه تشاركوني اهتمامتي وحب اشوف ارائكم , سواء بموافقتي او بمعارضتي ولكن بالأسلوب الحواري الهادف الي يساعدنا معرفة وفهم الأراء المختلفه في مجتمعنا .
أكيد تبون تعرفون منوا أنا ..
بدون مقدمات
انا شيخة ومطيره ولميعة وزينب بنت شملان ومناحي و عاشور أخت سلوم وعليوي وفهيد بنت سبيكة وقداره وصيته وحميده
أنا باختصار بنت الكويت ألي تحب الكويت وما تفرق بين بدوي وحضري وشيعي وسني
وحدساوي وليبرالي أو علماني واسلامي ,
تحب الكويت و تخاف عليها من الحساد والطامعين , تدرس وتشتغل عشان لحتاجتها الكويت تقول روحي فداج ,
بأخلاقها محافظه وبدينها معتزه ما نست الحيا والعادات الكويتية الأصيلة من كرم وسنع
وحب الخير والجيران و غض البصر مع خفضت الصوت ...
البوشية والبرقع والحنة والديرم دايم بغرفتها موجودين تفتخر فيهم وبأصالتهم...
هذي أنا بنت الوطن
حياكم الله
